Agenda 2023-09-27

25 ekitaltik gora bertso udaren amaieran

Bertsolariek askotan izendatu dutenez San Migeletan bukatzen da bertso uda, irailaren 29 bueltako asteburuan, alegia. Hemen amaitzen da herriko jaien kolpe nagusia eta, beraz, bertsolarien udako bertso moldearen zati nagusia. Azken txanpa honetan hogei bertso ekitalditik gora dakartza agendak. Horietako asko jaien ingurukoak baina baita udazkenera begirakoak ere, Bizkaiko Txapelketa kasu.  

Ostegunetik hasita, Tabuen Kutxatik oholtzara emanaldia izango da Hernanin. Ostiralean, hainbat jaialdi: Iruran, Irurtzunen, Urnietan, Loiuko Laurota auzoan, Eibarren eta Iurretan. Saran, Taldekako Xilabako saioa. Pello Errota Sariketako bigarren kanporaketa jokatuko da Ikaztegietan. Zumaian Artadi auzoan, Mungian, Zumetzaga auzoan izango dira bertsoak.

Larunbatean, jaialdia izango da Lazkaon eta Bertsoderbia Amasa-Villabonan. Urrozen bertso bazkaria eta Amenduzen Taldekako Xilaba. Saio literarioa Hernanin. Baraibarren, eskekoa. Zumaian, bertso afaria Artadin.

Igandean Bizkaiko Txapelketako lehenengo final-laurdena jokatuko da Mungian. Zumaian jaialdi musikatua goizean eta Markina-Xemeinen Ez da kasualitatea jaialdi musikatua. Oñatin balkoitik balkoirako urteroko saioa. Igantzin bertso bazkaria eta Uztaritzen ere bertsoak Lapurtarren Biltzarrean.