Taldekako Xilaba 2023-10-03

Saran eta Amenduzen, jendez beteta Taldekako Xilaba

Saran eta Amenduzen jokatu dira Taldekako Xilabako beste bi saio. Sarako Urtxola ostatua tiki gelditu zen ostiraleko saioan. Etxeko Lizaieta taldean Etxahun Azkarraga, Ellande Alfaro, Haira Aizpurua eta Karlos Aizpurua izan ziren kantari. Kakoiak taldetik Beñat Larrory, Aetz Etxart, Joanes Etxeberria eta Leire Casamajou xiberutarrak. Haserako agurrek giroa erabat goxatu zuten eta saio emankorra eskaini zuten Aitor Servierrek proposaturiko gaiekin. Lizaieta taldea gailendu zen.

Larunbatean Amenduzen izan zuen hitzordua Taldekako Xilabak. Bertako Eskukula eta Ez dok 5 taldeak lehiatu ziren bertan. Pettan Prebende, Bittor Thikoipe, Ramuntxo Christy eta Paul Moralek osatzen dute Eskukula taldea. Saioaren irabazlea Ez dok 5 taldea izan zen. Bertako partaide dira Maddi Sarasua, Battitt Crouspeyre, Oier Urreizti, Xermin Camblong eta Joana Itzaina. Eihera jendez bete zen eta giro bikaina sortu zen, Ortzi Idoate gai emaile izan zelarik.