Nafarroako Bertsolari Txapelketa 2023-11-15
Nafarroako azken finalaurrekoa zuzenean Bertsoan
Nafarroako Txapelketako azken finalaurrekoa zuzenean emango du Bertsoa.eus-en, igandean 17:30etan. Saioko sarrera guztiak agortu dira.
Joanes Illarregi Marzol, Eneko Lazkoz Martinez, Josu Sanjurjo Alzuri, Eki Mateorena Zozaia, Mikel Lasarte Cia eta Beñat Astiz Isasi ariko dira bertsotan. Gai-jartzaile lanetan, Alaitz Rekondo Ferrero, eta epaile, berriz, Amaia Telletxea, Cesar Etxeberria, Mikel Beaumont, Nerea Bruño eta Saioa Mitxelena.
Saioko irabazlea zuzenean sailkatuko da abenduaren 2ko finalera, momentuz Saioa Alkaizak eta Julio Sotok, Altsasuko eta Agoizko saioetako irabazleek, hurrenez hurren, egin bezala. Gainontzekoek, finalaurrekoen faseko sailkapen osoaren arabera izango dute toki bat ala ez finalean.
Hain zuzen ere, Lesakakoa azken finalaurrekoa izanda, saioa bukatutakoan argituko da finalean ariko diren zortzi bertsolarien zerrenda. Une honetan, horrela dago faseko sailkapena. Finaleko sarrerak, bestalde, salgai daude dagoeneko www.bertsosarrerak.eus atarian.
