Gernika-Lumon larunbatean 2024-01-29

Bertsoak eta jai-giroa Bertso Egunean Ariatzan eta Gernika-Lumon

Muxika eta Gernika-Lumon ospatu zen larunbatean Bertso Eguna. Duela 65 urte sortu zen Garriko bertso-eskolari aitortza eginez hasi zen eguna Ariatzan Jon Enbeitaren bertsoarekin. Bertso jarriak eta bat-batekoak izan ziren goizean Atxelipe elkartean eta hamarretakoa ondoren.

Ariatzako ekitaldia amaituta, Gernika-Lumorako bidea hartu zuen Bertso Egunak. Lau tabernetan bertso poteoak izan ziren bazkal aurretik, Iparraldeko bertsolariek bidea zabalduta.

Goizeko saioari azken errematea Lilibertsokoek jarri zioten Astran bertan.

Ondoren bazkari jendetsua eta jaialdia etorri ziren arratsaldean. Maialen Lujanbio, Sustrai Colina, Saioa Alkaiza eta Etxahun Lekue aritu ziren kantuan, Aitor Etxebarriazarragak gaiak jarrita. Bertso jarriek ere izan zuten beren tartea.

Gauean, DJ Bull-ekin jarraitu zuen jaiak.