Larunbatean jokatu zen Gabirian Osinalde Elkartean 2024-04-08

Aner Euzkitzek irabazi du 52. Osinalde Saria

Aner Euzkitzek irabazi du 52. Osinalde Saria, bere hirugarren eta azken parte hartzean. Aurretik bi aldiz izan da bigarren eta larunbatean borobildu zuen Osinaldeko bere ibilia. Bigarren Aitor Tatiegi gelditu zen. Berak lortu zituen publikoaren saria eta bertso onenaren saria. Hirugarren Eki Mateorena gelditu zen; laugarren, Maddi Aiestaran; bosgarren Bittor Altube eta seigarren Aitor Ugarte.

Maila handiko finala eskaini zuten sei bertsolari gazteek eta saioan zehar seiek utzi zituzten bertso dotoreak.

Larunbat gauean jokatu zen Osinalde Sariko finala Gabirian 140 lagun inguru bilduta, Ane Etxezarretak aurkeztuta. Epaile lanetan, Lurdes Murua, Aratz Igartzabal, Eresti Oiarbide, Asier Iriondo eta Asier Ibaigarriaga aritu ziren. Orotara, 18 bertsolarik hartu dute parte aurtengo edizioan ere eta hiru kanporaketa jokatu dira finalaren aurretik Zaldibian, Aztirian eta Ordizian.

Bertsoa.eus ere Osinalden izan zen eta protagonisten hitzak eta finaleko bertsoak bildu zituen.