Gaur aurkeztu dute Bilbon 2025-06-10

Bizkaiko Txapelketa: 37 bertsolari eta finalaurrekoak bi itzulitara

Irailaren 28an abiatuko Bizkaiko Bertsolari Txapelketa Urdulizen. Orotara, 37 bertsolarik hartuko dute parte: Udaberriko fasetik 21 bertsolari eta aurreko edizioan txartela eskuratu zutenak, 16. Besteak beste, aurreko zortzi finalistetatik zazpi izango dira Bizkaiko Txapelketan. Nerea Ibarzabal txapeldunak ez du parte hartuko. Eneko Abasolo Abarkasek ere parte hartzek aukera zuen eta ez da txapelketa izango. Abarkasen kasuan, bertsotan iragarri zuen agurra.

Finalerdiak bi itzulitara
Antolaketa aldetik, aurtengo Bizkaiko Txapelketaren aldaketa nagusia da finalerdiak bi itzulitara izango direla eta bietan puntuaziorik altuena lortzen duten zortzi bertsolariak sailkatuko dira finalerako. Lehen itzulian hiru finalaurreko jokatuko dira eta 18 bertsolari ariko dira kantuan; bigarren itzulian, bi saio izango dira. Puntuazio altuena lortu duten zortziak, finalera. 

Finala Bilbon abenduaren 20an Casillan
Bost kanporaketa eta bost finalaurreko jokatuta, abenduaren 20an jokatuko da Bizkaiko finala eta aurten leku aldaketa izango da. Miribillan izan ordez, Casillan jokatuko da. 

10 txartel Txapelketa Nagusirako
Bizkaiko Txapelketak interesgune desberdinak izango ditu eta horietako bat Txapelketa Nagusirako bertsolarien zerrenda da. Bizkaiko Txapelketako 10 ordezkari izango dira 2026ko Txapelketa Nagusian eta sailakapen orokorrean 10 puntuaziorik altuena eskuratzen dutenek eskuratuko dituzte. Finalerdietako bigarren itzulian argituko da hori.

Bizkaiko Bertsolari Txapelketa gaur aurkeztu dute Bilbon. Belate Olabarria Bizkaiko Bertsozale Elkarteko presidenteak, Ione Narbaiza Bizkaiko Bertsozale Elkarteko koordinatzaileak eta Leixuri Arrizabalaga Bizkaiko Foru Aldundiko Euskara, Kultura eta Kirol diputatuak hartu dute parte.