'Baina bat sobera' lanarekin Mendaron 2025-07-07

Ekaitz Goikoetxeak irabazi du Txirristaka Bertsopaper Sariketako lehen saria

Ekaitz Goikoetxeak irabazi du Mendaron Txirristaka Bertsopaper Sariketako lehen saria Baina bat sobera lanarekin. Sortaren kalitatea nabarmendu zuen,  bereziki "gauzak iradokiz esateko duen gaitasun handian" azpimarra jarrita. Garaikurra eta 1.000 euroko saria eskuratu zituen. Bigarren aldia da Goikoetxeak Txirristaka Saria jasotzen duena. Izan ere, 1999ko edizioan ere bera gertatu zen irabazle. 

Helduetan, Oier Etxeberria Zubimendi azpeitiarrarentzat izan zen bigarren saria. Nire traje onenez bertso-sortagatik saritu zuten. Etxeberriak garaikurra eta 500 euroko saria jaso zituen.

Gazteen mailan, Oier Juaristi Agirrebeña azkoitiarrak jaso zuen lehengo saria, Mundua bertso-sortagatik eta Mara Orbe Alcalde bilbotarrarentzat izan zen bigarren saria.

Gaztetxoen artean, Nora Garate Larrañaga elgoibartarrak irabazi zuen Altxor bat Mendaro sortarekin eta Anitz Ezenarro Narbaiza mendaroarrak jaso zuen bigarren saria, Uda ostean bertso sortagatik.

Epaimahaia Irune Basagoitik, Aitor Zubikaraik eta Eneko Beretxinagak osatu zuten.

Idoia Narbaizak egin zituen aurkezpen-lanak eta Mendaroko alkate Enetz Ezenarro eta In Leike kultur elkarteko presidente Eukene Gurrutxaga aritu ziren sariak banatzen. Guztira sei sari banatu zituzten, hiru kategoriatan, eta txikitik handira banatu zituzten. Mendaroko Udalak eta In Leike kultur elkarteak antolatu dute Txirristaka Bertsopaper lehiaketa, iaz berreskuratu ostean.