Sarasate pasealekua obretan 2026-07-02

Alde Zaharreko San Jose plazan dira aurten Iruñeko Sanferminetako jaialdiak

Jexux Mari Irazu

Sanferminetan hainbat bertso saio izaten dira Iruñean, egitarau ofizialaren barruan, Iruñeko Udalak eta Nafarroako Bertsozale Elkarteak antolatuta. Azken urteetan Sarasate pasealekuan egin dira. Aurten, eremu hori obretan dagoenez, Alde Zaharreko San Jose plazan izango dira hiru jaialdiak, uztailaren 7an, 9an eta 11an. 


Sarasate plaza obretan. Eskabadora dagoen puntuan izaten zen jaialdia.

Aurtengo hiru jaialdiak
Bi ohiko jaialdi eta saio musikatua izango dira aurten ere, azken urteetako dinamikari jarraiki:

Uztailaren 7an, 19:00etan: Saioa Alkaiza, Sustrai Colina, Bittori Elizalde eta Sarai Robles. Gai-jartzailea: Ainhoa Larretxea.

Uztailaren 9an, 19:00etan: Miren Artetxe, Xabat Illarregi, Mikel Lasarte eta Andoni Rekondo. Gai-jartzailea: Iratxe Legarra

Uztailaren 11an, 19:00etan, "Ez da kasualitatea" bertso saio musikatua: Irantzu Idoate, Kattin Madariaga eta Maddi Ane Txoperena. Gai-jartzailea: Maialen Belarra. Musikariak: Araitz Bizkai eta Oihana Landa. 

Saio gehiago Peña eta elkarteen eskutik
Sanferminetan bertso egitarau zabala izaten da. Programazio ofizialeko saioez gain Peñek eta elkarteek ere antolatzen dituzte bertso ekitaldiak: bertso bazkariak, poteoak, balkoitik balkoira... Beraz, San Jose plazan ez ezik, festa giro betean ere izango da bertsoaz non gozatua Iruñeko Sanferminetan.