Bertso jaialdia Donostiako Antiguan 2010-05-24

Joxe Agirre: "Etsipenik ez hartu/segi eta segi"

Bertso jaialdia izan zen atzo arratsaldean Donostiako Antigua auzoan. Amets Arzallus, Beñat Gaztelumendi, Joxe Agirre, Sustrai Colina, Miren Amuriza, Aitor Sarriegi eta Jon Maia aritu ziren bertsotan, Unai Gaztelumendiren esanetara. Auzipetutako gazte talde baten babes gisa antolatutako saioa izan zen eta 550 entzule inguru bildu ziren Antiguako frontoian. Saio ederra egin zuten bertsolariak. Bertsoa.com-eek zuzenean eman zuen ekitaldia.

Etsipenik ez hartu/segi eta segi bota zuen Joxe Agirrek, karga bereziko ekitaldian. Ofiziotan hasteko, Unai Gaztelumendi Arzallus, Sarriegi eta Colina egungo egoera politikoari kantari jarri zituen. Ez ziren bereziki itxaropentsu agertu bertsolariak. Egunari zegozkion egoerak eta gai komikoagoak tartekatu zituen Gaztelumendi gazteak. Maia eta Beñat, anaia paperean jarri zituen gaijartzaile eta bertsolari hain zuzen. Oso saio polita egin zuten. Bakarka, Beñat Gaztelumendik epaiketara zihoan gaztearen larrutik kantatu zuen, motxila egiten ari zela. Antigua Donostia ote den eztabaidan sartu gabe, Amets Arzallus Odon Elorza alkate paperean jarri zuen gaijartzaileak eta atzeko seiek beren eskakizunak egin zizkioten.

Eguraldiak eta giroak emandako berotasunean joan zen saioa, hasierako bertsotik. Txalorik beroenak Joxe Agirrek jaso zituen. Zenbaitetan kantari hasterako ere jo zion publikoak txalo Agirreri.

• 
•