Zuzeneko Elkarrizketak 2010-06-15

Bertsoa.com-ek Sebastian Lizaso elkarrizketatuko du bihar

 Bertsoa.com-ek zuzeneko elkarrizketa bat egiten du asteazkenero. Aste honetan Sebastian Lizaso izango da gonbidatua. Joxe Lizaso bertsolariaren semea eta Beñat Lizaso bertsolariaren aita da Sebastian. Urtea joan eta urtea etorri, plazan gehien dabiltzan bertsolarietako bat da. Erantzuten bizia eta ahots indartsukoa, gutxi izango dira bertatik bertara entzun ez duten bertsozaleak.

 Txapelketetan ere maila onean ibili izan da. 1982an parte hartu zuen lehenengoz Txapelketa Nagusian eta finaleraino iritsi zen. 1986an txapela eskuratu zuen, 1989an bigarren geratu zen, 1993an hirugarren eta 1997an, berriz, bigarren. Ordutik ez da Txapelketa Nagusian aritu. Hala ere, 1999an Gipuzkoako Herriarteko Txapelketan parte hartu eta finalerdietara iritsi zen Azpeitiko taldearekin.

 Sebastian Lizasorena izango da denboraldiko azkeneko elkarrizketa. Udan Bertsoa.com-ek atseden bat hartuko du elkarrizketei dagokienez, eta zein hobea Sebastian Lizaso baino udari ongi-etorria emateko, udako bertso-jarduna gutxik ezagutzen baitute berak bezain ondo.

 Arratsaldeko 17etan hasiko da elkarrizketa. Galderak bidali ditzakezue honako helbide honetara: info@bertsoa.com.

• 
•