Gipuzkoako Bertsolari Txapelketa 2011-12-17

Gipuzkoako finala zuzenean Bertsoa.com-en

Bertsoa.com-ek zuzenean emango du Gipuzkoako finala, 16:30etan hasita. Jexux Mari Irazu, Beñat Gaztelumendi, Iñaki Apalategi, Aitor Sarriegi, Unai Agirre, Agin Rezola, Alaia Martin eta Jon Martin ariko dira kantuan.

 Honako lan hauek burutu beharko dituzte finalistek:

 -Binaka, gaia emanda, 6 puntuko motzean, hiruna bertso
 -Bakarka, lehen puntua emanda, zortziko txikian, hiruna bertso
 -Binaka, gaia emanda, zortziko handian, hiruna bertso
 -Binaka, gaia emanda, zortziko txikian, hiruna bertso
 -Bakarka, gaia emanda, nahi den doinu eta neurrian, hiruna bertso

 Hau izango da zortzi finalistek bete beharko duten lana, 15na bertso puntuagarrirekin. Ondoren, bi bertsolari sailkatuko dira buruz burukora. Honako ariketa hauek egin beharko dituzte bertan:

 -Binaka, gaia emanda, hamarreko txikian hiruna bertso
 -Binaka, gai librean, puntutan, zortziko txikian, 8 bertso osatu arte
 -Kartzelako lana:
   -Banaka, hitza gaitzat emanda, bertso bat, bederatziko txikian
   -Bakarka, gaia emanda, nahi den doinu eta neurrian, hiruna bertso (ikus-entzunezko bidez emango da gaia)

 Hala, iluntzeko 20:45ak aldera txapeldun berria izango du Gipuzkoak. Aurtengoan Laxaro Azkune irrati-esatari eta gai-jartzaile ezagunari dagokio txapeldunari txapela janzteko ohorea. 1991ko Gipuzkoako Txapelketa antolatu zuen taldeko arduraduna izan zen, eta baita Erniarraitz Bertsozale Elkartearen sortzaileetako bat ere.

• 
•