Gipuzkoako Bertso Eskolen Eguna 2012-05-07

300 bat neska-mutiko elkartu ziren Zumaian

 Gipuzkoako Bertso Eskolen Eguna ospatu zen atzo Zumaian. Denera 300 bat neska-mutiko elkartu ziren bertan, urtean zehar bertso-eskoletan egindako lanaren ondoren elkar ezagutu eta gozatzeko asmoz. Gaur egun hamaika irakasle ari dira, Gipuzkoako Bertsozale Elkartearen eskutik, hezkuntza arautuan bertsolaritza irakasten, eta beste mordo bat dabiltza bertso-eskoletan eragiten. Aurtengoa Bertso Eskolen Egunaren zortzigarren edizioa izan da.

 Eguraldia lagun, egitarau oparoa izan zuten bertaratu zirenek. Goizean Lip Dub bat grabatu zuten Zumaiako kaleetan, eta, bazkalostean, bertso-trama batekin gozatzeko aukera izan zuten. Josu Goikoetxea aritu zen tramagile lanetan, eta ondoan izan zituen kantuan Maialen Lujanbio, Jon Maia, Beñat Gaztelumendi eta Aitor Sarriegi bertsolariak. Behin trama bukatutakoan Lip Dubaren emaitza ikusi ahal izan zuten gaztetxoek. Nahi izanez gero interneten dago ikusgai.

• 
•