Saio musikatua Oñatin 2012-05-07

Bertso-doinuak Kalezaharran

Nabari da uda ate-joka dugula eta jaietan ohi den moduan, kalean egin zuten bertso-saio musikatua. Goruntz begiratu eta ezin jakin euria egingo ote zuen ala ez, baina azkenean zeru urdinak ere bat egin zuen jai-giroarekin.

Jende asko zebilen kalean, batzuk apropos saioa entzutera etorritakoak eta beste batzuk kuriositatez begira geratutakoak; baina denek entzun zituzten arretaz musikatutako bertsoak.

Aitzol Barandiaran, Jokin Labayen, Jon Martin eta Manex Agirre igo ziren oholtzara kantura; Egoitz Aizpuru gai-jartzaile lanetara; eta Eneko Sierra, Imanol Ugarte eta Jimmy musika-instrumentu banarekin.

Ordu t'erdi iraun zuen saioak eta umoretik aritu ziren gehienean, gai-jartzaileak hortik bideratu baitzuen emanaldia. Saioa bukatutakoan  ilargia nola zegoen ikusita, "Ilargia"-ren doinuan abestea besterik ez zitzaien falta izan.