Aurten Joakin Berasategi omenduko dute 2012-10-17

Urriaren 27an eta 28an izango da Xalbador Eguna

 Aurten ere Xalbador Eguna ospatuko dute Urepelen (Nafarroa Beherea), Fernando Aire "Xalbador" oroitzeko. Urriaren 27an eta 28an izango da ekimena, eta urtero bezala, aurten ere omendu bat izango da bertan. Aurtengoan Joakin Berasategi, Deiadarra elkarteko kide izan zena omenduko dute. "Sendoa" saileko sortzaile eta editore izan zen Berasategi, eta hainbat bertsolari klasokoren obrak eta biografiak argitaratu zituen.

 Xalbador Egunerako egitarau oparoa prestatu dute antolatzaileek. Hilaren 27an, larunbatez, Eider eta Gorka Zabaletaren kantaldiarekin hasiko dituzte ospakizunak. Ondoren, Nafarroari eta kintoari buruzko mahai ingurua egingo dute Angel Ainziburuk, Antton Kurrutxarrik eta Jose Mari Iriondok.

 Hurrengo egunean izango dira, dena den, ekitaldi gehien. Gernikako bonbardaketari buruzko bideoa eskaintzeaz gain Donapaleuko joaldunak eta Baigorriko trikitilariak ibiliko dira kaleetan, eta Larraineko dantzariek emanaldi bat egingo dute plazan. Herri kirolak ere izango dira. Gainera, Joakin Berasategi omentzeko bideo emanaldi bat ere prestatu dute. Bertso-saioa ere igandez izango da. Aurtengoan Jose Luis Gorrotxategi, Aitor Sarriegi, Sebastian Lizaso eta Jose Juan Eizmendi "Loidisaletxe II" jardungo dira bertsotan.

• 
•