Mungiako Taket Bertsolari Alkarteak antolatuta 2012-12-13

San Antontxu Bertsopaper Lehiaketa martxan

 Mungiako Taket Bertsolari Alkarteak San Antontxu Bertsopaper Lehiaketa antolatu du aurten ere. 15. edizioa beteko du ekimenak, eta bere lekua egina dauka Euskal Herriko bertsopaper lehiaketen artean.

 Aurtengoan ere bi kategoria bereizi dituzte antolatzaileek. Gazteek (18 urtera artekoek) gutxienez 6 eta gehienez 8 bertsoko sortak bidali beharko dituzte. Kategoria honetako irabazleak 200 euro eta taketa jasoko ditu; bigarren gelditzen denak 150 euro eta oroigarria eta hirugarrenak 100 euro eta oroigarria. Mungiako bertso-sortarik onenak ere saria jasoko du.

 Helduen kategoriako partehartzaileek, berriz, gutxienez 8 eta gehienez 12 bertsoz osatutako lanekin hartuko dute parte. Maila honetan lehenengo gelditzen denak 400 euro eta taketa irabaziko ditu; bigarren gelditzen denak 300 euro eta oroigarria eta hirugarrenak 200 euro eta oroigarria.

 Bi kategorietan gaia eta neurria libreak izango dira. Gainera, bertsoek berriak izan beharko dute, inon argitaratu eta aurkeztu gabekoak alegia. Partehartzaile bakoitzak gehienez bi sorta bidaltzeko aukera edukiko du.

 Lanak bidaltzeko epea abenduaren 31n itxiko da. Nola bidali? Antolatzaileek bi aukera eman dituzte.

 Posta arruntez bidali nahi izanez gero bertso-sortak eta beste hori kopia ezizenez sinatu eta gutunazal handi batean sartu beharko dira, gazteen edo helduen kategoriako sorta den adierazita. Beste gutunazal batean egilearen datuak jarri beharko dira, kategoria ere adieraziz. Gutunazal hori kanpotik ezizenez sinatu eta sortekin batera bidaliko dira honako helbide honetara:

  AGIRRE JAUREGIA
  Astiunerako Udal Erakundea
  San Antontxu Bertsopaper Lehiaketa
  Taket Bertsolari Alkartea
  Aita Elorriaga, 2
  48100 Mungia
  Bizkaia

 Nahi izanez gero sortak e-mailez bidaltzeko aukera ere badago. Kasu honetan bi dokumentu bidali beharko dira. Batean sorta joango litzateke, ezizenez sinatuta eta kategoria (gaztea edo heldua) adierazita. Bigarren dokumentuan egilearen datuak agertuko dira, ezizena eta kategoria adieraziz. Bi dokumentuak honako helbide honetara bidali beharko dira: taketba@gmail.com.

 Sari-banaketa 2013ko urtarrilaren 20an egingo da, goizeko 12etan, Mungiako Andra Mari Karpan egingo den bertso-saioan.

• 
•