Bizkaiko Txapelketari buruz ariko dira 2012-12-20

Arkaitz Estiballesi elkarrizketa Hitzetik Hortzeran

 Aste honetan ere Hitzetik Hortzera programa izango da ikusgai ETB1ean. Ostiralean iluntzeko 21etan eta igandean arratsaldeko 15etan, bertsolaritzaz gozatzeko parada izango dute telebista pizten dutenek.

 Aste honetan Bizkaiko Bertsolari Txapelketako finalak pisu handia hartuko du. Alde batetik, txapelketako bertsoaldi onenak eskainiko dituzte. Horrez gain, Arkaitz Estiballesi elkarrizketa egingo diote. Bizkaiko Bertsozale Elkarteko transmisio proiektuan lanean ari da galdakoztarra, eta ikastetxez ikastetxe berarekin batera ibiliko da Jon Artano. Basauriko Kareaga-Goikoa eta Bizkotxalde ikastetxeetara lagunduko diote kamerak aurten bigarrenez Bizkaiko txapela jantzi duen bertsolariari. Irakaskuntzaz eta txapelketaz ariko dira hizketan.

 Bestetik, joan zen larunbatean hil zen Joxe Agirrek ere izango du bere tartea aste honetako programan. Astelehenean Azpeitiko parrokian egindako hiletako irudiak eskainiko ditu programak. Gainera, "Ttantoa" atalean Joxe Agirrek 1981eko Bertsolari Egunean egindako bertsoaldi bat ere izango da gozagai. Joxe Mari Iriondok jarritako lau punturi maisutasunez erantzun zien azpeitiarrak.

• 
•