Larunbatean arratsaldeko 15:30etan 2012-12-20

Joxe Agirreri buruzko programa berezia eskainiko du ETB1ek

 "Joxe Agirre, Izarraizko azeria" programa berezia eskainiko du ETB1ek larunbat honetan arratsaldeko 15:30etan. Joan zen larunbatean hil zen Joxe Agirre, eta azpeitiarraren ibilbidearen errepasoa egingo du programak. Alde batetik, bere bertsoaldi aukeratuak eskainiko dituzte. Puntu-erantzule trebea zen "Oranda", eta ariketa horretan egindako bertsoaldi onenak eta bakarkakoak emango dituzte batetik. Bestetik, binaka belaunaldi ezberdinetako bertsolariekin osatutako saioak izango dira ikusgai: Joxe Lizasorekin, Imanol Lazkanorekin, Amets Arzallusekin eta Arrate Illarorekin hain zuzen ere.

 Bertsoez gain, Joxe Agirreri buruzko testigantzek ere lekua izango dute programan. Jokin Uranga, Imanol Lazkano, Laxaro Azkune, Xabier Euzkitze, Sebastian Lizaso, Joxean Agirre eta bertsolaritzari lotutako beste zenbait aurpegi ezagunek hitz egingo dute Joxe Agirreri buruz. Eta orain dela urte batzuk Joxe Agirrek berak Manuel Sein "Xanpun", Jon Azpillaga eta Joxe Lizasorekin Rezola sagardotegiko mahai-jiran egindako tertuliako pasarterik onenak ere erakutsiko dituzte.

• 
•