Bertsomovieda 2013-03-21

Botoa emateko epea zabalik

 Joan zen astean bukatu zen Bertsomovieda lehiaketarako lanak aurkezteko epea. Beasaingo Arrano Kultur Elkarteak antolatutako ekimenak bigarren edizioa du aurtengoa, eta bideoa eta bertsoa uztartzen dituzten lanei zuzendua dago. Partehartzaileen lan guztiak ikusgai daude www.bertsomovieda.com helbidean, eta nahi duenak bozka dezake bere gustukoena. Denera 33 lan daude ikusgai. Bozkatzeko epea igandean itxiko da.

 Antolatzaileek bi kategoria bereizi dituzte. Gazteen kategorian ariko dira taldekide zaharrenak 16 urte baino gutxiago dituztenak. Hemengo irabazleek 400 euro jasoko dituzte. Helduen kategoriako sarituek, berriz, 1000 euro poltsikoratuko dituzte. Dena den, sari nagusiez gain beste batzuk ere banatuko dituzte. Hala, ikusleek aukeratutako lanak 550 euroko saria jasoko du. Epaimahaiak hala erabakiz gero aipamen berezia jasotzen duen lanak 300 euroko saria izango du. Bukatzeko, epaimahaiaren ustez bertso onenak dauzkan bertsomovie-ak 250 euro jasoko ditu. Sari-banaketa ekitaldia apirilaren 12an egingo dute.

• 
•