Kataxulo Txapelketa 2013-04-22

Oier Aizpurua txapeldun

 Joan zen ostiralean jokatu zen Kataxulo Txapelketako finala Oiartzungo Gaztetxean. Kanporaketak jokatu ondoren, honako bertsolari hauek sailkatu ziren finalera:

 Amaia Iturriotz
 Oier Aizpurua
 Mikel Artola
 Manu Goiogana
 Maialen Akizu
 Txaber Ormazabal

 Saioa jarraitzeko 100 bat lagun elkartu ziren gaztetxean, giro beroan. Ariketa bereziak jarri zizkieten gai-jartzaileek hasiera-hasieratik bertsolariei, agurrak puntuagarriak izan baitziren. Bitxikeria ugari utzi zituzten bertsolariek. Ondoren, beren ezkerrekoa aurkeztu behar izan zuten bertsolariek, fruitu banarekin parekatuz.

 Behin ariketa bereziak eginda, ofiziotako lanak iritsi ziren, zortziko handian eta zortziko txikian. Bereziki bigarrenean nabarmendu ziren bertsolariak, eta hiru ofizioak entzungai daude Bertsoa.com-en.

 Oiartzungo hitzekin bertso bana bota behar izan zuten bertsolariek gero, eta egokitutako objektuei ere bertso bana bota zieten. Hortxe bukatu ziren seikoteak egin beharreko lanak. Saioa nahiko parekatua iritsi zen honaino, eta ez zen erraza buruz burukora zein helduko ziren asmatzea. Azkenean, epaileek hala erabakita, Maialen Akizu eta Oier Aizpurua sailkatu ziren bigarren fasera. Hemen gaia emanda bina bertso eta koplatako saio bat egin behar izan zituzten. Buruz burukoa osorik dago entzungai.

 Oier Aizpuruak lortu zituen txapela eta entzuleen saria, umore handiko saioa osatuta.

• 
•