Alkizako bertso-jaialdia 2013-09-16

Udako azken bertso-zaparrada

Urteroko zita da honako hau Alkizako eta inguruko bertsozaleentzat. Herri-afaria egin zuten saioaren aurretik pilotalekuan bertan eta inor gutxi mugitu zen handik bertso-saioa amaitu arte. Adin askotako herritarrak elkartu ziren bertsoekin gozatu asmoz.

Hamaiketan zen hastekoa saioa eta ordu bete lehenago hasi ziren gerturatzen bertsozaleak. Bertsolariak ere ordurako agertu ziren oholtzaren atzekaldera eta bertsozaleei gehiegi itxaronarazi gabe igo ziren oholtzara Maialen Lujanbio, Uxue Alberdi, Amets Arzallus, Jon Maia, Andoni Egaña eta Xebastian Lizaso, Amaia Agirre gai-jartzailea aurretik zutela.

Uxue Alberdik lehen aldia bazuen ere, bertsolarientzat plaza ezaguna da Alkizakoa eta eroso egon ziren saio osoan. Gai-jartzaileak umoretik bideratu nahi izan zuen saioa eta bertsolariek ondo eutsi zioten tonuari. Hala ere, hausnarketarako amua ere bota zien Amaia Agirrek.

• 
•