Kalapitaren omenez 2009-04-03

Bertso bazkaria izango da gaur

 Kalapitaren aldeko bertso bazkaria izango da gaur Zarautzen. Aitor Urbietak azaldu duenez, "Kalapita aldizkari bat da, Antonianoetako ikasleek sortua. Euskara hutsean idazten da eta denetarik dakar: txisteak, komikiak...". Aitor Urbietak berak, Andoni Egaña, Hodei Iruretagoienak eta Julen Zulaikak kantatuko dute bazkarian. "Antonianoetatik pasatutako bertsolariekin egin nahi zuten bertso bazkaria. Hodei eta ni orain dela gutxi pasa ginen ikastetxetik, besteak aspaldiagotik".

 Zarauztarren arteko bertso bazkaria izango da, beraz, gaurkoa. "Nik gehiago kantatzen dut herrian bertan eta erosoago aurkitzen naiz. Hodei oso ondo ezagutzen dut. Julenekin ere eroso kantatu izan dut, baina azken aldian ez dut berarekin batera kantatu eta badut berarekin aritzeko gogoa. Egañarekin, berriz, sekula kantatu gabea naiz, eta horrek kezka sortzen dit".

 Gaurko bertso bazkaria Antonianoetako ikasleentzat prestatu zen batez ere. "Aste Santu aurreko azkeneko klase eguna da, eta horregatik aukeratu zen gaurko eguna. Hala ere, azkenean kanpoko jende dezente inguratuko omen da ziurrenik".

 Bertso saioa Zarauzko frontoi txikian da egitekoa. Eguraldiak lagunduko ez balu Antonianoetan bertan egingo litzateke.

• 
•