Hernani 2014-03-11

Ez da kasualitatea

Iraia Eliasek saio amaieran gogorarazi zuen moduan emakume-bertsolariak kanta dezakete urte osoan,  ez daude mutu.  Baina badirudi oraindik kasualitatea dela lau emakumek oholtzan elkarrekin kantatzea.

Besteak beste, horixe da "Ez da Kasualitatea" saioek aldarrikatu nahi dutena. Martxoak 8aren bueltan saio asko antolatzen dira bertsolari-emakumez osatutako kartelekin, ia ez da izan bestelakorik asteburu honetan. Alderantziz gertatzen da gainontzeko asteburutan. Bada nahikoa arrazoi buruari buelta pare bat emateko...

Saio musikatua izan zen ostiralekoa. Eneko Sierra eta Ixaak Arruti musikariek tono goxoa jarri zuten kanturako saxoarekin eta gitarrarekin. Biteri aretoa ilun jarri zuten  goxotasun-girorako eta goxo kantatu zuten Onintza Enbeitak, Uxue Alberdik, Eli Pagolak eta Ainhoa Agirreazaldegik.

Goxotasunak goxotasun, denetariko gaiak jarri zizkien Iraia Eliasek. Bizitzaz aritu ziren kantuan, urteen joanaz, nostalgiaz, bizi-esperientziaz... Eta hartu zuten tartea bertsolaritzaren historian esandako hamaika gezur abesteko edota abortoaren lege berriak izan ditzakeen eraginak azaleratzeko.

• 
•