Kabitik Plazara 2009-04-08

Bertso afaria "arrakastatsua" izan zen

 Joan zen ostiralean bukatu zen Kabitik Plazara ekimena. Egun horretan bertso afaria izan zen Tolosako Iurre elkartean. Jexux Mari Irazu, Bixente Gorostidi eta Anjel Mari Peñagarikano aritu ziren kantuan. Antolatzaileek azaldu dutenez, "elkartea goraino bete zen". Azkenean bi ordu t`erdiz aritu ziren bertsolariak kantuan.

 Bertso afariak bi zati eduki zituen. Lehendabizikoan Igotz Alkorta gai-jartzaileak gidatu zituen bertsolariak. Irratia izan zen gai nagusia, eta horri lotuta egoera ezberdinetan kantatu zuten. Esate baterako, Gorostidik eta Irazuk Peñagarikano elkarrizketatu behar izan zuten, iragarkiak asmatu behar izan zituzten eta aitatasunaz hitz egin zuten irrati-tertulia batean. Horrela aritu ziren ordubetez. Entzuleak "gustura" gelditu omen ziren lehenengo zati honetan.

 Ondoren, libreko saioa etorri zen. "Hiru bertsolariak eskualdekoak izanik, norberari bere herria defendatzea egokitu zitzaion beste bertsolarien erasoetatik". Antolatzaileen esanetan, hirurak "bikain" aritu ziren.

 Txolarre Irratiak antolatu du aurten Kabitik Plazara ekimena, eta "gustura" agertu da larunbateko bertso afariarekin. Esperientzia "errepikatzeko modukoa" izan omen da. Saioko bertsoak entzungai daude hemen.

• 
•