Gipuzkoako Bertso-Eskolen Eguna 2014-05-26

Festa handia Arrasaten

Gipuzkoako Bertso-Eskolen Eguna ospatu zen atzo Arrasaten. Egun osokoa izan zen, eta 250 haurrek hartu zuten bertan parte. Aurten, gainera, Eskolarteko Txapelketari astinaldi bat eman eta lehenengoz 14 urtetik beherakoetan ez da lehiarik izan. Horren ordez, saio didaktikoak antolatu dira. 14 eta 18 urte artera bitartekoek, berriz, txapelketa jokatu dute, baina kanporaketak modu informalagoan eginda.

 Bertso Eskolen Eguna
 "Oinak buruan" leloa izan du aurtengo Bertso Eskolen Egunak, eta lelo hori zeramaten kamiseta morez jantzita ibili ziren haurrak Arrasateko kaleetan barrena. Arratsaldean, berriz, Zirku Tailerra egin zuten Gaztetxean.

 Maila ona Eskolartekoan
 Goizeko 11:00etan hasi zen Eskolarteko Txapelketako finala. Honako zortzikote hau iritsi zen azken saiora: 

Iñigo Ibañez
Amaia Urbieta
 Iratiz Mateo
 Eneko Araiztegi
 Maider Arregi
 Jon Gurrutxaga
 Aratz Igartzabal
 Paul Iruretagoiena

Amaia Agirre eta Maialen Lujanbiok aurkeztu zuten saioa eta  Zigor Leunda, Karlos Ibarguren eta Maite Sukia aritu ziren epaile lanetan. Idazkari lanak, berriz, Eneritz Artetxek bete zituen. Denera 400 bat entzule izan ziren saioan. Azkenean Maider Arregiri jantzi zion txapela Patxi Goikoeleak. Iñigo Ibañez geratu zen bigarren.

 Idatzizko sariak

 Idatzizko sariketan, berriz, lau kategoriatako sariak banatu ziren. 8 eta 9 urte artekoetan Ordiziako Jakintza Ikastolako Sara Garcia nagusitu zen; 10 eta 12 urte artekoetan Zarauzko Orokoeta Herri Eskolako Aner Perez; 12 eta 14 urte artekoetan Azpeitiko Iraurgi Ikastetxeko Iker Letamendia eta 14 eta 18 urte artekoetan Urretxuko Joxemari Iparragirre Institutuko Maialen Akizu.

• 
•