Bertso-jaialdia Mungian 2014-07-14

Bazkalaurreko bertso-aperitiboa

Mungiako plazako Andra Mari estalpe ederra bertso-kantuz betetzen da urtero Sanpedro egunez. Bazkalaurreko aperitiboa bertsolariek jarri ohi die herritarrei eta arrakasta handia izaten du; oraingoan ere ia 400 lagun elkartu dira.

Ez da saio luzea izaten; bertsozaleei bertso-gosea eta bazkalaurretik bestelako aperitiboren bat hartzeko denbora uzteko adinakoa alegia.

Bertso-gosez  uzteak ez du esan nahi ordea emandakoa eskasa denik. Ederki aritu ziren kantuan Andoni Egaña, Etxahun Lekue, Sustrai Colina eta Jone Uria. Umorez, serio, jolasti, zorrotz...  denetarako denbora izan zuten ordubeteko saioan.

Bertsoaldi hautatuak ere denetarikoak: Andoni Joneri aholku-eske, Etxahun eta Jone txozna-arduradun, Andoni eta Etxahun Espainiako Erregearen aforamenduari buruz eta beste bi bakarkako, Andonik erabakitze-eskubidea kantugai eta Sustraik euskara.

Saioaren amaieran Andoni eta Sustrai entzuleen artean eserrarazi zituen Bernardok, haien begietatik kantatzeko.

• 
•