Bertsoa Unibertsitatean 2014-07-11

Gaur bukatuko dira Udako Ikastaroak

 Gaur bukatuko da "Bertsoa Unibertsitatean" zikloa. Astelehenetik hasi eta gaur arte, denera hiru ikastaro izan dira Donostiako Miramar Jauregian. Astelehenetik asteazkenera "Bertsolaritza eta Ahozkotasuna Hezkuntza Arautuan" ikastaroa izan zen; atzo "Bertsolaritza eta beste sorbideak" eta gaur izango da hirugarrena: "Bertsolaritza eta gaurko gizartea". Hiru hizlari ariko dira gaur.

 Hasteko, Xabier Aierdik, bertsozaletasunaren inguruan egindako bi ikerketa soziologikoetatik abiatuta, "Bertsozaletasuna eta euskal gizartea" hitzaldia eskainiko du. Ondoren, Jon Sarasuaren txanda izango da: "Bertsolaritza, komunikazioa eta herrigintza". Azkenik, Miren Artetxek Iparraldeko bertsolaritzaren transmisioak hizkuntza erabileran daukan eragina aztertuko du, egiten ari den ikerketa batetik abiatuta.

 Giro ona atzo

 Atzo arratsaldean bertsogintza beste sorbide batzuekin nahasteko saio esperimentala egin zuten. Jon Martin gai-jartzaile zela, Maialen Lujanbio eta Unai Iturriaga aritu ziren bertsotan, eta maila handiko saioa atera zen. Denera 70 bat lagun bertaratu ziren saioa jarraitzera. Bertsoaldirik onenak laster izango dira entzungai Bertsoa.com-en.

• 
•