Markina-Xemeingo jaialdia 2014-07-29

Uda bete-betean Markina-Xemeinen

Eguraldia lagun Uhagon Kulturgunearen kanpoaldean izan zen bertso-jaialdia. Arrakasta handi izan zuen Karmen jaietako urteroko saioak.

Lehen Guardia Zibilen "kuartela" zena kulturgune bilakatu dute Markina-Xemeinen. Gauza batzuk asko aldatzen dira baina beste batzuk ez. Aldatzen ez den saio horietakoa da Markina-Xemeingoa. Urtea joan eta urtea etorri Karmen egunez antolatzen dute bertso-jaialdia.

Bertsolariak bai, bertsolariak aldatzen dira. Aurten Andoni Egaña, Jone Uria, Nerea Elustondo eta Joseba Artza igo dira oholtza txikira Amaia Errasti gai-jartzailearekin batera.

Leku polita da Uhagon kulturgunea eta eguraldiak laguntzen badu plaza ederra da bertsotarako zuhaitz eta zelai berdez inguratuta. Adinean aurreratuenek azkar hartu zituzten oholtza aurreko aulkiak; noski, gazteak lurrean eserita ere ez baitute altxatzeko arazorik izango.

Udako giroan bete-betean sartuta jolasti zeuden gai-jartzailea eta bertsolariak. Eta horrelaxe hasi zen saioa, umoretsu eta adar-jotzaile: Andoni eta Jone, Joseba eta Nerearen omenaldia prestatzen.

Binaka jarrita Trivial-ean jolastu ziren lauak. Amaia gai-jartzaileak puntu bidez egin zizkien galderak. Ez zen garbi geratu zein izan zen garaile...

Segidan, bakarka aritu zen Nerea Elustondo azkenaldian gure jendarteak bizi izan dituen aldaketei buruz; eta bukatzeko, Jone eta Joseba kuriositateak jota-edo elkarri galdeketa egiten. Galderak bai, ez dakit erantzunik egon ote zen.

Saioa amaituta gustura altxa ziren zaharrenak aulkietatik eta gazteak lurretik.