Momentuari helduz 2016-10-27

Bertsoa eta musika inprobisazioak uztartuta

 Denbora da Oskar Estanga bertsolaria musikari lotutako emanaldietan batera eta bestera dabilela. Behin, Garesen saio musikatu bat egitera joan eta Alazne Untxalo bertsolariarekin eta Alberto Arteta musikariarekin elkartu zen. Entseguetan frogak egiten hasi, gustatu eta lan horretan sakontzea pentsatu zuten. Hortik sortu da "Momentuari helduz" emanaldi berezia.

 "Bertsolariak musikari eta musikariak bertsolari"

 Alazne Untxalok azaldu duenez, lehendik ere badu esperientzia musikaren laguntzaz kantatzeko, musika-talde batean aritua baita. Oskar Estangaren iritziz, emanaldi berriari esker pausu bat eman dute aurrera, musikariek eta bertsolariek elkarrekin inprobisatuko baitute. "Musikariak bertsolari eta bertsolariak musikari" ariko dira, beraz.

 Iruñeko Bertsoaroan

 Joan zen asteartean Iruñeko Bertsoaroaren baitan izan zuten estreinaldia, Kondestablearen jauregiko Civivox hitzaldi areto dotorean. Jende asko bertaratu zen saioa jarraitzera, eta entzuleek berotasunez hartu zuten proposamena. Emanaldiko unerik onenak ikusgai daude Bertsoan, eta baita protagonisten hitzak ere.

• 
•