"Berriak jaio ginen" 2017-06-08

Belaunaldi baten argazki pertsonala

 Euskal Herrian bereziak izan ziren 80ko eta 90eko hamarkadak. Rocka pil-pilean zebilen, baina oraindik ere aurreko ohitura eta tradizioei lotutako eremuek bizirik zirauten. Musika, kultura eta bizitza ulertzeko modu berri horiek bidea ireki zuten gero eta hiritarragoa zen gizarte batean. Eta baita bertsolaritzan ere. Bertso-eskoletatik ateratako lehenengo gazteek plazarako jauzia eman zuten, eta aurreko belaunaldietako bertsolariekin batera aritu ziren oholtzan kantuan.

 Argazki pertsonal bat
 Garai horren "argazki pertsonal bat" osatu du Jon Maiak "Berriak jaio ginen" liburuan. Plazarekin eta belaunaldi zaharragoetako bertsolariekin izandako lehenengo harremanez aritzeaz gain bertsoak erdal eremuetan izandako sarreraz eta beste kultur adierazpen batzuekin izandako harreman artistikoez ere idatzi du, eta gaur egungo bertsolaritza ulertzeko gakoak ematen ditu liburuan.

 Lanku Bertso Zerbitzuak-en eskutik argitaratu da liburua, eta Jon Maiaren testua Igor Elortzaren hitzaurrearekin, Unai Iturriagaren marrazkiekin eta garaiko argazki-sorta aberats batekin horniturik dator. Gaur egin da aurkezpen prentsaurrekoa Donostiako Rekalde tabernan, eta bertan izan dira Jon Maia bera, Andoni Egaña editorea, marrazkiak egiten aritu den Unai Iturriaga eta Lankuren ordezkari gisa joandako Marta Agirrezabala.

• 
•