Igor Elortzak iritzi artikulua idatzi du 2009-06-24

"Herri-kulturgintzaren alde"

 Igor Elortzak iritzi artikulu bat idatzi du gaurko Berriarako. Kulturgintzari buruz hausnartzen du bertan. Berak uste du "gure gaur egungo egoeraz hausnartzen dugunean kulturgaietan lar zentratzen" garela; "ez dugu kultur eragileengan eta kulturgaien funtzioetan behar beste erreparatzen."

 Masa-kulturgintza ez omen da gutxietsi behar, baina kontutan izanda "gaitz" batzuk sortzen dituela. Igor Elortzaren iritziz bi dira bete beharreko gakoak: batetik, "kulturaren eta politikaren arteko dialektikari zorrotz heldu behar genioke ahalik eta lasterren, integratzaile baina konplexu barik, eta, esatea beste izatea dagokigulakoan, hizkuntzartekotasuna landuz". Bestetik, "ilustrazioak ekarri dizkigun sailkapen zurrun eta sarritan klasistak ere gainditu behar genituzke behingoz, gainera, tradizioa eta modernotasuna ez baitira ezkontezinak, ezta kultura jasoa eta popularra ere, besteak beste."

 "Nire ustez, utzi eta gutxietsi samar dugun herri-kulturgintzako lan jarraitu, itzaleko eta auzolanekoa da euskarazko kulturgintzak egun duen berme bakarra helburu kuantitatibo nahiz kualitatibo anbiziotsuagoei arrakastaz ekin ahal izateko."

 "Kasualitatea ez den artean"

 Joan zen ostiralean "Ez da kasualitatea" izenburuko bertso-saioa izan zen Mutrikun. Honako bertsolari hauek kantatu zuten bertan:

 Uxue Alberdi
 Ainhoa Agirreazaldegi
 Maddalen Arzallus
 Estitxu Eizagirre
 Unai Muñoa

 Ixiar Eizagirre eta Egoitz Aizpuru aritu ziren gai-jartzaile lanetan. Bertso saio hari buruzko kronika idatzi du Beñat Zamalloak Berrian.

 Saioa berezia izan zen. Honela bukatu zuen Uxue Alberdik bere hasierako agurra: "Gaur, oso izan nahi dugu / ez tokatzen den partea. / Lau neska eta mutil bat / ez da kasualitatea / baina zinez nahi genuke / noizbait hala izatea".

 Bertso-saioko unerik onenak ikusgai daude Bertsoplazan.

• 
•