Pello errota 100 urte 2019-05-22

Kantuz oroitu dituzte Pello Errota eta Mikaela Elizegi Asteasun

Pello Errotaren heriotzaren mendeurreneko egitarauaren barruan, kantaldi bat egin zuten ostiralean. Eñaut Agirrek jarri zien ahotsa bertso zaharrei, eta Imanol Kamio, Aitor Atxega eta Gari Otamendi arduratu ziren musikaz.

Asteasuko Santa Kruz ermita aspaldiko bertsoz eta kontakizunez bete zen joan den maiatzaren 17an. Pello Errotaren eta Manuela Elizegiren garaiko bertsoaldien aukeraketa bat kantatu zuen Eñaut Agirre bertsolariak, musikarien laguntzaz: Aitor Atxega gitarrarekin, Imanol Kamio piano eta akordeoiarekin, eta Gari Otamendi biolinarekin. Iñaki Mujika herriko musikari gazteak ere Pello Errotaren bertso ezagun bat bertsionatu zuen. Giro ederrean joan zen gaua, iraganeko pasadizo, zirto eta gertaera xelebre artean.

Urte osorako egitaraua

Asteasuko Udalak hainbat ekimen antolatu ditu aurten Pedro Elizegi 'Pello Errota'ren heriotzaren mendeurrena ospatzeko, eta horietako bat izan da bertso zaharren kantaldia. Bere alaba Manuela Elizegi ere omendu nahi dute, hark kontatu baitzizkion aitaren pasadizoak eta bertsoak Antonio Zabalari, eta horrela iritsi da gaurdaino Pello Errotaren berri.

Kantaldiko bertsoaldien hautaketa ikusgai hemen.