Bertsoaroa 2020 2020-11-04

Jaialdi berezi batek emango dio hasiera bihar aurtengo BertsoAroa zikloari

Biharko saioan aurreneko edizio hartan parte hartu zuten  Sebastian Lizaso eta Andoni Egaña entzuteko aukera egongo da eta beraiekin batera bi gazte, Joanes Illarregi eta Sarai Robles. Gaiak jartzen ere lehen jaialdi hartan aritu zen Mikel Taberna ibiliko da eta berarekin batera, azken urteetako Bertsoaroan hainbatetan aritutako Alaitz Rekondo.

Saiorako gonbidapenak (pertsonako bi gehienez) lekuan bertan eskuratu ahalko dira 17.30tatik aurrera eta bukatu arte. 

Ekitaldi hasieran Iruñeko I. Bertsopaper Lehiaketako sari ematea ere egingo da. Guztira 24 lan aurkeztu dira lehiaketara, hiru kategoriatan banatuta, eta Ekhi Rojo, Beñat Astiz eta Saioa Alkaizak irabazi dituzte sari nagusiak. Informazio gehiago bertsozale elkarteko webgunean. 

Nafarroako Bertsozale elkarteak eta Iruñeko Udalak antolatzen duten Bertso Aroa zikloaren baitan hainbat saio eta ekitaldi antolatu dira azaroaren 26a bitarte, beti ere behar diren neurri guztiak betez, aforo mugatuekin eta erantzukizunez jokatzeko deia eginez. Bertsoa.eus atarian jarraipen berezia egingo da datozen asteetan zehar.