Bihar, zuzenean 2021-02-25

Jarraitu Uhinak saioa Bertsoa.eus atarian

Ez du edonolako urtebetetze festa antolatu Tolosaldeko Ataria komunikabidean eskaintzen den (H)ari Naizela bertsolaritza irratsaioak; 200 programa ere ospatzeko modukoak dira, egia esanda. Hala, aurreko astean iragarri genuen bezala, ospakizunerako bertso saioa izango da bihar, eta www.bertsoa.eus atarian ere jarraitu ahal izango duzu, zuzenean.

Planak azken momentura arte lotzen ez dituen horietakoa bazara, zorionekoa zu, oraindik sarrera batzuk geratzen baitira Amasa-Villabonako Gurea aretoan izango den saiorako; hemen eros daitezke. Bestalde, etxetik gozatu nahiago duenak, www.bertsoa.eus-en ez ezik, www.ataria.eus webgunean eta Ataria Irratian ere jarraitu ahal izango du, zuzenean.

Amets Arzallus, Julio Soto, Maialen Lujanbio eta Oihana Iguaran izango dira bertsotan, Imanol Artola "Felix"en gaiei erantzunez. Amasa-Villabonako Gurea aretoan izango da hitzordua bihar, 19:00etatik aurrera. 

2016an abiatutako (H)ari Naizela bertsolaritza programa Harituz Tolosaldeko Bertsozale Elkargunearen, Tolosaldeko Ataria komunikabidearen eta Bertsozale Elkartearen arteko elkarlanaren emaitza da, eta lankidetzan antolatu dute saio hau bera ere, Amasa-Villabonako Udalaren laguntzarekin.