I. Señora sariketa 2021-05-06

Señorak, Lesakatik streaming bidez zuzenean

Sarrerak agortuta egonagatik, saioa zuzenean jarraitzeko aukera izango duzue larunbatean bertsoa.eus eta eitb.eus atarietan. Ohorezko señora gonbidatuak Onintza Enbeita eta Amaia Agirre izango dira.

Haizea Arana, Miren Artetxe, Paula Amilburu, Saioa Alkaiza, Onintza Enbeita eta Amaia Agirre izango dira bertsolariak eta Ainhoa Larretxeak egingo ditu gai-jartzaile lanak. Aramaion eta Mutrikun izan ziren aurreko asteetan sailkapen saioak eta bertatik lau bertsolarik lortu zuten finalerako txartela. Bi ohorezko señora gonbidatu batu zaizkio laukoteari, Onintza Enbeita eta Amaia Agirre, gaur arte sorpresan atxikiak izan direnak.

Saioa 17.00tan hasiko da Lesakako Arranoko Terrazatik. Bertaratu ezin duenak edo sarrera gabe geratu denak etxetik zuzenean segitzeko aukera izango du eitb.eus eta bertsoa.eus atarietan. Ez galdu!