I. Señora Sariketa 2021-05-10

Autopistak sortzen bidezidorretan

Haizea Arana Cardenal, Miren Artetxe Sarasola, Paula Amilburu Izargarai, Saioa Alkaiza Guallar, Onintza Enbeita Maguregi eta Amaia Agirre Arrastoa izan ziren oholtzaren gainean, Ainhoa Larretxearen gidaritzapean, kantuan aritu ziren señorak.

Ofizioak, puntukako saioa, kartzelakoan bakarka atzekoen laguntzaz... maila handiko saioa izan zen hasieratik eta bertaratutako entzuleek bertsoaz eta giroaz gozatzeko parada ezin hobea izan zuten. Azkenean, Onintza eta Amaia sailkatu ziren buruz-burukora eta bertsolari villabonatarrak lortu zuen garaipena.

Sariak ematera izen handiko señorak gerturatu ziren Lesakara. Sariak ematera Rosi Lazkano eta Maialen Lujanbio altxatu ziren lehenik, Kristina Mardarasek eman zion saria bigarren sailkatuari eta Estitxu Arozenak jantzi zion 'pamela' txapeldunari.

Agur honekin borobildu zuen saioa Amaia Agirre Arrastoak:

Esti, Maialen, Rosi,

garai gogorretan

Kristinan artelanak

gizonen obretan

erreka bat sortu zait

begi lehorretan

antolatzaileekin

nihoa zorretan

bidelagun gazteak

artistak horretan

segi autopistak sortzen

bide zidorretan

Zorionak guztiei!