I. Aixita bertso sariketa 2021-05-17
Eli Pagola nagusi lehen Aixita sariketan
Irurtzungo Pikuxar Euskal Txokoak antolatuta iaz izan behar zuen lehen edizioa sariketa berri honek. Pandemia egoerak hala behartuta ordea, aurten eta jaialdi estiloan burutu behar izan dute azkenean.
jendez bete zen Irurtzungo Kultur Etxea, Euskal Herriko punta ezberdinetatik etorritako seikotea entzuteko gogoz: Eli Pagola, Imanol Uria, Iker Gorosterrazu, Maddi Ane Txoperena, Saioa Alkaiza eta Xabi Igoa. Zigor Gartzia "Zian" izan zen eguneko gai-jartzailea.
Eli Pagola bertsolari hernaniarrak lortu zuen azkenean txapela janztea eta bigarren egin zuen Imanol Uria algortarrak. Txapela Manu Legarrak jarri zion, Allin jaiotako Irurtzundarrak. Bertsoarekiko lotura handia izan du beti: txapelketaren antolaketan urte askoan ibilia, gai jartzaile taldean ibili zen eta noiz edo noiz bertsolari gisa ere aritua.
Zorionak Eli!
Azpiko albistean Barañaingo bertso eskolako kide eta antolatzaile izan den Mintxo Astiz bertsolariaren hitzak.
