Bertso Agenda 2022-05-13

35 bertso ekitalditik gora asteburuan

Bertso plazak aukera zabala dakar asteburu honetan ere, bai kopuru, bai formatu eta bai aniztasun aldetik ere. Orotara, 35 bertso ekitalditik gora izango dira gaurtik igandera, aurreko asteko antzeko kopurua.

Gipuzkoan, Adin-Adin programa hasiko da gaur, zahar etxetako bertso ekitaldiak, Azpeitian. Basque Culinary Centerreko eta Antzuolako urteroko jaialdiek ere orain dute hitzordua, besteak beste. San Isidro Eguneko saioak ere Gipuzkoan izango dira.

Bizkaian, Udaberriko Bertso Saioak hasiko dira bihar Bilbon, Taldekakoa azken txanpara bidean jarriko da Arrigorriagan eta Ez da Kasualitatea jaialdi musikatua Basaurin, besteak beste. Araban, herrialdeko txapelketak azken final laurdena jokatuko du.

Nafarroan, Mingañe Saltsan eta Aixita sariketak izango dira Aranon eta Irurtzunen, eta jaialdia Garraldan. Lapurdin, Haizea dator ekimena Senperen, Señora Sariketa Hendaian eta jaialdia Biriatun.

Ikusi agenda xehea, Xenpelar Dokumentazio Zentroko gunean.