Txapelketa Nagusia 2022-11-10

Langak argitzen

Jexux Mari irazu

Durangoko finalaurrekoaren atarian, lehen itzuliko lautik hiru jokatuta, finalerako eta bigarren itzulirako langak ari dira pixkanaka finkatzen. Finalerako lehian, Alaia Martinek koska bat gorago jarraitzen du 729,5 punturekin, oraingoz zazpigarren sailkatuari (Ibarzabal) 56,5 puntu aterata. Joanes Illarregiren 711 puntuko langa ez du Martinek bestek gainditu eta bere hautagaitza sendotuz doa lehen itzulian. Puntuei dagokionez, Sustrai Colina duela bost urteko langaren paretsu ibili da (705,5 orduan, 710 puntu joan den larunbatean Irunen).

Zazpiehun puntutik behera, Donibane Garaziko lehen biak datoz. Oihana Iguaranek (688,5) eta Amets Arzallusek (688) finaleko atea oso zabalik izan lezakete bigarren itzulian.

Koxka bat beherago, lehen itzulian finalaren beheko langan ibili litezkeenak, Agin Laburu (678) eta Nerea Ibarzabal (673). Durangoko saioaren faltan, Agin Laburu dago seigarren txartelaren langan kokatuta eta Nerea Ibarzabal zazpigarren. Laburu 2017an ere finaleko postuetan sailkatu zen lehen itzulian.

Langa horretatik behera gelditu direnek, Jone Uriak (660,5), Unai Agirrek (652) eta Miren Artetxek (644) lehen itzuliko sailkapenari itzuli handiagoa eman beharko diote finaleko aukerak izateko. Izan da horrelakorik ere. 2013an Unai Iturriagak 648 puntu lortu zituen lehen itzulian Gasteizen. Bigarren itzulian, 14. postuari buelta eman eta seigarren postuan sailkatu zen finalera, Elizondon 725 puntu aterata. 2017an Unai Agirrek 667 puntu eskuratu zituen lehen itzulian eta gero finalean sartu bigarren itzulian 696 lortuta.

24 bertsolaritik 18 bigarren itzulira
Bigarren itzulirako sailkapenari dagokionez, berriz, Maddalen Arzallus artekoak (bera barne) matematikoki sailkatuta hurrengo faserako. Ane Labaka dago oraingoz mugan. Berak, Nerea Elustondok eta Iñaki Apalategik badituzte beren aukerak bigarren itzulian izateko, Durangoko puntuen arabera.

Sailkapenean hortik behera daudenek, Haritz Mujikak, Asier Azpirozek eta Aitor Etxebarriazarragak oso aukera urriak dituzte.

Memoria ariketa egite aldera, hemen 2017an bigarren itzulira sailkatu zirenen zerrenda eta puntuak. Amets Arzallus finalean sartu zen.