Bertso jarriak Hitzetik Hortzeran 2023-10-16

«Zahartuko gara», Aitor Etxebarriazarragaren sorta

Aitor Etxebarriazarragaren sorta ekarri du Hitzetik Hortzerak aste honetan: Zahartuko gara sorta Ezkondu eta ezkongai doinuan. Grabaketa Bergarako Seminarixoan egina da.

Zahartuko gara

1
Aurre gabeko atzea,
helmugara ailegatzea,
behin hasia bukatzea.
Zenbat alditan amestu ote den
denboraren geratzea,
zaila da irudikatzea
inon larruan sartzea,
zer ote da zahartzea?

2
Handitzean edadea,
galtzen da habilidadea,
askoren atsekabea.
Sentitzen hasten zaren unean
ia baliogabea,
non da komunidadea?
nork osatzen du sarea?
Nork moztu bakardadea?

3
Erresidentzi aukerez,
herentziz eta karterez,
zein osasun gorabeherez.
Bere aurrean aritu dira
seme-alaba asko berez,
familiako aferez,
oinerdekoen boterez,
ulertuko ez balu legez.

4
Gizarte independente
bat eraikitzeko bete
mila pisu indezente!
Joan ziren lehengo etxalde eta
famili omnipresente,
Lehen mundu dekadente
hontaz ez gara kontziente
ta auzokoa ausente.

5
Begitara begiratzen
jarrita ez gara biratzen,
baina eztugu hitzik hartzen.
Mila galdera ditudan arren
egitera ez naiz ausartzen…
Zerk ote gaitu banatzen?
Kostatzeko hainbeste asmatzen,
nagusiekin harremantzen.

6
Bizitzan azken bolada,
bakoitzak bere bolara,
bizitzeko kaiola da.
Zubi guztiak erre ditugu
inor ez heltzeko hara,
urrutitik badaezpada,
nahiz aldendu begirada
denok zahartuko gara!