Arriaga antzokian izango da, arratsaldeko 17:30etan 2009-10-11

Bertsolari Txapelketa Nagusiko 3. saioa izango da gaur Bilbon

 Jokoan da Euskal Herriko Bertsolari Txapelketa Nagusia. Joan zen astean hasi zen txapelketa, Zestoan. Atzo jokatu zen bigarren kanporaketa Leitzan, eta gaur izango da hirugarrena, Bilbon. Arratsaldeko 17:30etan hasiko da saioa, Arriaga Antzokian. Honako bertsolari hauek kantatuko dute:

 Amaia Agirre
 Maddalen Arzallus
 Jexux Mari Irazu
 Asier Otamendi
 Julio Soto
 Iñaki Zelaia

 Beraz, hiru gipuzkoar (Agirre, Zelaia eta Irazu), arabar bat (Otamendi), nafar bat (Soto) eta lapurtar bat (Arzallus) igoko dira oholtza gainera. Adinean bada alderik: 30 urte paseak dira Otamendi, Agirre, Irazu eta Zelaia. Sotok eta Arzallusek, berriz, 25 urtetik behera dituzte: 21 Juliok eta 18 Maddalenek (txapelketako gazteena da). Esperientzia handiena Jexux Mari Irazuk du Txapelketa Nagusian, laugarren partehartzea izango baitu aurtengoa. 1997an eta 2001ean finalista izan zen gainera. Dena den, ez da esperientziadun bakarra. Amaia Agirre finalaurrekoetara iritsi zen 2005ean, Asier Otamendik laugarren partehartzea du aurtengoa eta Iñaki Zelaia lehenago ere aritua da Txapelketa Nagusian. Julio Soto eta Maddalen Arzallusentzat lehenengo partehartzea izango da.

 Saioa Maite Berriozabalek gidatuko du. Berak ere lehenengo partehartzea du hau Txapelketa Nagusian.

 Antolakuntzak saiora goiz agertzeko eskatu du, sarrerekin arazorik izan ez dadin. 1100 lagunentzako lekua izango da antzokian.

• 
•