Nafarroako Bertsolari Txapelketa 2023-11-23

Nafarroako zortzi finalistak ilusioz eta final on bat egiteko arduraz

«Poza» eta «ilusioa» dira bereziki Nafarroako zortzi finalistei abenduaren 2ko final handian kantatzeak sortu diena. Horrekin batera aipatu dituzte «ardura», «zorroztasuna», «argitasuna», «aukera», «egun handia»... finalisten aldartearen erakusgarri. 2006tik lehenengoz Nafarroako final batean bi emakumezko bertsolari izango dira oholtzan kantari. Estitxu Arozena eta Erika Lagoma aritu ziren orduan. Saioa Alkaiza eta Sarai Robles aurtengoan. Bortzirietatik Iruñerrira.

Eneko Lazkoz izango da finalista beteranoena 40 urterekin. Zortzigarren finala du. Julio Soto da finalik eta txapelik gehien dituena: hamaikagarren finala eta bost txapel. Saioa Alkaizak egungo txapeldun gisa kantatuko du bere bigarren finalean. Joanes Illarregi izango da Nafarroako finalean kantatuko duen lehenengo Txapelketa Nagusiko finalista. Xabat Illarregi da zortzikoteko gazteena: 22 urterekin hirugarren finala du Leitzarrak. Saats Karasatorre eta Sarai Robles dira finaleko berritasunak, aurretik bide luzea egina dutenak biak.

Bertsoa.eus-ek guztien hitzak jaso ditu.