Bertsozale Elkartea eta Bortzirietako bertso eskolaren eskutik 2025-01-25

Bertso Eguna gaur Lesakan

Zortzigarren Bertso Egun ibiltaria ospatuko da gaur Lesakan, Bertsozale Elkarteak Bortzirietako Bertso Eskolarekin batean antolatu duena. Lesakak eta eskualdeak bertsolaritzari egin dion ekarpenaren aitortza du Bertso Egun honek oinarrian eta goizetik ordu txikietara arteko festa eguna izango da gaurkoa.

Goizean, Oinak bideak ibilaldia egingo dute, Lesakako bertsolaritzaren historiaren inguruko ibilbide gidatua, erreferentziazko izan diren puntu eta guneetatik barrena. Ondoren, bertso poteoa. Epifora, Lilibertso eta Aramaioko bertso eskolako kideak ariko dira kantuan: Ane Zuazubiskar, Danel Herrarte, Iraide Onaindia, Manex Agirre, Eli Pagola, Maider Arregi, Oihana Arana, Uxue Alkorta, Aitor Etxebarriazarraga, Asier Galarza, Ibai Amillategi eta Iker Uriarte. Ondoren luntxa.

Arratsaldean jaialdia eta gauean bertso jarri musikatuak
Arratsaldeko 17:00etan bertso jaialdia izango da, Harriondoa kultur etxean: XXI mende, 25 (H)illbeltz Alaitz Rekondok gidatuta, Alaia Martin, Amets Arzallus, Julio Soto, Maddi Ane Txoperena, Nerea Ibarzabal eta Peru Abarrategi ariko dira kantuan.

Ondoren afaria izango da Juan Mari Lopez bertsolariaren sagardotegian eta bertso jarri musikatuen txanda etorriko da gero.

Arratsaldeko eta afaritarako sarrerak joan den astean agortu ziren. Goizeko eta eguerdiko ekitaldiak irekiak izango dira.
.