Zutabea 2025-04-01

«Aritu denak badaki taldeko giroak zenbat baldintzatzen duen bertso eskolan»

Iker Gorosterrazu Elizagoien

Erantzun aunitz izan ditzakeen galdera egin didazu Amaia, eta erantzun bakar bat ere ez dut modu seguru batean errateko. Horregatik ez diot zure galderari erantzunik emanen seguraski.
Guraso izan naizenetik ni aldatu naizela erranen nizuke, beraz nire aldaketa horrek gainerako kontu guztietan eragina izanen duela ez dago dudarik.

Bertso eskola bakoitzaren profila ere desberdina da, eta ez da sekula berdina izanen eremu euskaldun eta bertsozale bateko bertso eskola edo eremu erdaldun batekoa. Izan ere, bertsoa seguraski aitzinetik ezagunagoa izanen dute batzuek (dela etxetik edo herrian bizitakoagatik), eta bertzeentzat hezkuntza arautuan jaso izanak bertso eskolan izena emateko orduan eragin zuzena izanen du.

Edozein dela ere kasua, beti eta aunitzetan aipatu izan dugun bezala, bertso eskola espazio segurua eta goxoa izatea da bertsogintzaren transmisio egokirako lehendabiziko baldintza. Behin hori bermatua izaki, lagun giro atseginean eta gozamenetik bertsotan arituz edozein lagun bertsozaletuko da neurri batean. Horrela kontatuta denak erraza dirudi baina aritu denak badaki taldeko giroak zenbat baldintzatzen duen bertso eskolan.

Hau guztia pasa ahal izateko, ordea, lehenbizi bertso eskolan izena eman behar du batek. Gaur egunean eskolaz kanpoko jardueren zerrenda zein den ikusita ia miraria da haur batek bertsotan aritu nahi izatea eta hala nahi badu horretarako denbora tarte bat hartzea. Helduen bertso eskolak ere erreferentzia ederra dira ttikienentzat eta ziklo osoa osatu duten eskualdeetan bertsozaletasuna naturalki trasmititu da.

Irati, zu gazte zinela hasi zinen bertso eskolan eta nondik ailegatu zara bertso mundura? Nolakoa da zure esperientzia bertso eskolan?