Ahozkotasuna eta bertsolaritza proiektuaren barruan 2008-05-05

Gipuzkoako Bertsozale Elkarteak ia 50 jaialdi egingo ditu maiatzean ikastetxeetan

Gipuzkoako Bertsozale Elkartea duela zortzi urte hasi zen BERTSOLARITZA ETA AHOZKOTASUNA izeneko proiektuarekin ikastetxe desberdinetan lanean, eta urtez urte hedatzen joan da proiektua Gipuzkoako hainbat herritan. 36 herritan 86 ikastetxek egin dute bat gure proiektuarekin, eta 6000 ikaslerengana iristen gara gutxi gora behera. Datorren urtean 7000 ikasletik gora izango direla aurreikusten dugu.
   Ahozkotasuna eta bertsolaritza proiektuaren azken helburuetako bat kurtso bukaeran egiten dugun jaialdia da. Bertsolaritzaren bueltan lanean jardun diren neska mutilei jendaurrean aritzeko aukera eman nahi diegu proiekzio publikoan trebatu daitezen, horretarako beharrezkoak diren baliabideak eskainiz. Bide batez, guraso zein herritarrei egindako lanaren berri eman nahi diegu ikasleek aurreratu dutena islatzearekin batera.
     Ikastetxe bakoitzeko ikasle talde bakoitzak bost minutu inguruko emanaldia prestatu du Gipuzkoako Bertsozale Elkarteko adituaren eta ikastetxe bakoitzeko irakasleen laguntzarekin. Jaialdi hauek herrika antolatu dira, eta herri bakoitzeko ikastetxe desberdinak bilduko dira bertan. Azpimarratu behar da bertan egingo diren saio guztiak ikasleen lanaren ondorio direla, hau da, emanaldiko ideiak zein bertsoak neska mutilek landu  eta sortu dituztenak izango dira, eta eurak izango dira protagonista oso eta bakarrak.
    Urte osoko lanaren ondoren, oso motibagarria da ikasleentzat ikasi dutena jendaurrean proiektatzea, gainera oso aberasgarria da taldean bideratutako proiektu bat konpartitzea eta emaitzak elkarrekin gozatzea. Jaialdi honekin batera, liburu bana emango zaio ikasle bakoitzari kurtso amaieran. Liburuak Bertsometa izena du, eta Gipuzkoan ditugun talde guztiak biltzea du helburu. Talde bakoitzaren argazkia eta eurak egindako bertsoak topatuko dituzte bertan.