Hitzaldia eman zuen asteazkenean Elgoibarren 2010-10-25

Egaña: "Bertsolariok nahi duguna esatea oso zaila da"

 Joan zen asteazkenean hitzaldia eman zuen Andoni Egañak Elgoibarren, "euskara ala ezkara" hitzaldi-zikloaren barruan. Uxue Alberdiren galderei erantzunez bere bertso-ibilbidearen errepasoa egin zuen zarauztarrak. Hasi zenetik hona asko aldatu omen da bere bertsokera, publikoa ere nabarmen aldatu baita. Bertsolaritza "bizitzeko modu bat" delakoan dago. Orain arte "elitean" iraun izana txapelketei lotua dagoela uste du. Osasuntsu ikusten du bertsolaritza egun, eta orain zabaltzeko baino sakontzeko unea dela irizten dio.

 Bertsolaritzari egin dion ekarpen nagusia, berriz, honako hau izan omen da: "Duela 19 urte erabaki nuen bertsotara bakarrik dedikatzea. Funtzionarioa nintzen, eta hura dena laga eta bertsotara bakarrik dedikatu nahi nuela erabakitzea gogorra izan zen. Erabaki potoloa izan zen, nire amarentzat, batez ere. Harrez gero, beste bertsolari batzuk ere hartu dute bide hori, eta, beharbada, hori izan da nik bertsolaritzari egin diodan ekarpenik garrantzitsuena".

 Hitzaldiaren inguruko informazio zabala dakar Sustatuk.

• 
•