Bertso-jarri musikatuak Zarautzen 2013-08-26

Basarri kantuz gogoan

Uztailaren 18an egin zuten bertso-jarri musikatuen emanaldia Zarauzko Torre Luzeko parkean. Aurten, Basarriren jaiotzaren 100.urteurrena da eta omenaldi moduan, bere bertsoak abestu zituzten Motxian bertso-eskolako lagunek. Basarriren eskulturaren aurrean prestatu zuten eszenatokia eta 200 herritar inguru elkartu ziren.

Basarrik berak idatzitako bertsoez gain, bere garaiko beste bertsolariekin osatutako hainbat bertsoaldi ere ekarri zituzten gogora: Mitxelena, Uztapide eta Lazkao Txikirekin puntuka egindako saioa, Uztapiderekin senar-emazteen ahotik abestutako bertsoak eta Patxi Barberorekin osatutako bertsoaldia.

Bestalde, ezaguna egin da "Aitonaren malkoak" izeneko bertso-sorta ere. Basarrik ez zituen leku onean jarri emakumeak bertso horietan eta Inatxi Etxabek bertso bidez erantzun zion Basarriri. Etxabek berak abestu zuen Zarautzen.

Gainerakoan, Basarrik jarritako bertsoak abestu zituzten: erbestetik idatzitako "Landesko piñu artean" bertso-sorta, Iruntxiberriri idatzitako bertsoak, "Nork egin du gure galde" bertso-sorta eta Zarauzko herriari idatzitako "Ene, Zarautz maite" bertsoak.

Joxe Agirre gogora ekarriz, bere puntu-erantzunak ere abestu zituzten.

• 
•