Itsasun jokatu zen larunbatean 2014-05-06

Giro ederra eta sariak banatuta Hernandorenan

Itsasuko Indianoenia ostatuan jokatu da aurtengo Hernandorena saria, berrogei bertsozale inguru bertan zirela. Maddi Sarasua, Mikel Lasarte, Iñaki Tena, Mikel Iturriotz, Asier Galarza, Aitor Servier, Lur Renteria eta Ortzi Murua bertsolari gazteek kantatu zuten larunbat arratsaldean, eta Ainhoa Sarasua izan zuten gai-emaile. Bertsularien Lagunak elkarteak antolatzen duen Hernandorena sariak badu berezitasunik. Ez da irabazle bakar bat ohikoa den moduan, eta publikoak du epaia ematen. Bertso hunkigarriena, irringarriena, bertsolaririk gustokoena eta agurrik onena dira saritzen direnak.

Zortziko handian ofiziotan, hamarreko txikian lau oinak emanda eta bosgarrena asmatuz, zortziko txikian ofiziotan eta hitzari bertso bana. Horiexek izan ziren bertsolariek egin beharreko lanak. Hasierako eta bukaerako agur bereziak entzuteko aukera izan zen bertzeak bertze. Giro goxoan iragan zen saioa eta bertsolari gazte guztiek utzi zituzten ale politak.

Bukaeran publikoak paper batean idatziz hautatu zituen bertso hunkigarriena, agurrik onena, irringarriena zein gustokoen zuten bertsolaria. Gogokoenak Ortzi Murua eta Lur Renteria izan ziren, irringarrienak Mikel Lasarte eta Mikel Iturriotzek kantatu zituzten, hunkigarrienak aldiz Maddi Sarasuak eta Aitor Servierrek bota zituzten eta agurrik onenak Asier Galarza eta Iñaki Tenarenak izan ziren publikoaren arabera.

• 
•