Eskolartekoa 2014-05-14

Arabako Eskolartekoa abiatu da, Gasteizen eta Zalduondon

Asteburuan ekin dio Arabako Eskolartekoak, Gasteizen eta Zalduondon. Armentia Ikastolan izan genuen lehen geldiunea, 14tik beherakoek 50 lagun inguruko entzulegoa aurrean zutela. Lehendabizi 20 bat bertsolari gaztetxok Euskal Herrian puri purian dauden musika taldeen doinuak bertsotara ekarri zituzten. Ondoren bat-batean arituko zen boskotea oholtzaratu zen eta baita ikasturte osoan kantari fin aritu direla demostratu ere. Askari ederraren ostean 14tik 18 urte bitartekoen txanda iritsi zen, bajaren bat tarteko, Maddalen Arrausi, Ane Amor, Unai Anda eta Unai Argote aritu ziren kantuan. Gasteiztarrek Txapelketan aurrera egingo zutela erabaki zuten epaileek, Maddalen Arrausi eta Unai Argote.

Larunbat arratsaldean Lautadako gaztetxo eta gazteen topaketa izan zen Zalduondo Lazarraga jauregian. Aguraingo 5 gaztetxo lagun arteko saioan bat-batean aritu ziren lau oinak, bukaera emanda eta hitza emanda. Ondoren Zalduondoko bertso-eskolako 5 gazte aritu ziren bat-bateko lan exigenteagoekin. Epaileek erabaki zuten Egoitz Iradier eta Markel Yoyer sailkatzea Legution jokatuko den finalerako.

Datozen bi larunbatetan, Aramaion eta Kanpezun izango dira beste bi topaketak, eta finala Arabako Bertso Eskolen egunaren baitan, Legution, maiatzaren 31ean.

• 
•