Alaia Martini elkarrizketa 2014-05-15

"Askabide handia izan ziren bertso idatziak bere garaian"

 Garai batean bertsopaper asko idatzitakoa da Alaia Martin, "baina azken boladan enkarguzkoak ez badira oso gutxi. Momentu askotan ohitura neukan momentu horri bertsoak idazteko eta ziklo txiki asko itxi ditut horrela (...). Askabide handia izan ziren bertso idatziak bere garaian".

 Gaur egun bere bizitzan bertsopaperek ez dutela funtzio handiegirik betetzen uste du: "Enkarguz ekitaldi baterako egin izan ditut eta, nahiz eta gaur egun pereza pixka bat ematen didan, beti egiten dit ilusioa. Bertsomoviedak beste foku bat eman dio. Gaur egun ez dut uste zabalpen handiegirik daukatenik; ez diot sozializaziorik ikusten normalean".

 Dena den, bertso idatziek badute bat-batekoek ez duten zerbait: "Orain plazaz plaza nabilela bertsoak hor geratzen dira, plazako momentu eta leku horretan. Badoaz. Bertsopaperek hori daukate: hor geratzen dira, beren akatsekin. Bat-batekotasunak beti dauka halako haserre bat perfekzioarekin edo dena nahi bezain zehatz esan ezinarekin, eta bertsopaperek tarteka juxtu kontrakora eramaten zaituzte. Nahi adina denbora inberti daiteke bertso horretan, eta teknikoki hobetzeko eta zure esateko modu fidelenera itzultzeko modu ona dira".

• 
•