Alaia Martini elkarrizketa 2014-05-15

"Ikasleek euskal kulturarekin lotura ludiko xamarra izan dezaten saiatzen naiz"

 Alaia Martin Gipuzkoako Bertsozale Elkartean dabil lanean, transmisio sailean irakaskuntzan: "Bi astean behin joaten gara irakasleok eskola bakoitzera eta bertsolaritza lantzen dugu: bertsolariak ezagutu ditzaten, oinarrizko teknika... Nire kasuan, nahiko ingurune erdaldunetan nabilenez, euskal kulturarekin nolabaiteko lotura ludiko xamarra izan dezaten saiatzen naiz. Autokonfidantza hori lantzea ere garrantzitsua da niretzat: edonor gai dela minimoki kopla bat osatzeko. Agian bertsolari bat aterako da karanbolaz, edo gai-jartzaile bat, edo bertsozale bat... (...) Bereziki Irungo zonaldean ematen dut klasea, edo Oreretako inguru ez hain euskaldun batzuetan ere bai, baina ikusten dut gehienek bertsolaritzaren oroitzapen on xamarra hartzen dutela. Euskara lantzen duten ikasle askok lantzen dute halabeharrez beste modurik ez daukatelako gramatikari lotuta, baina agian alderdi ludikoago hori ez dute ikusten. Horretan beste mundu txiki bat badagoela eta ez dela imajinatzen duten bezain grisa adierazteko baliagarria iruditzen zait".

 "Presentzia handiko talde bat izan da bertso-eskola"

 Oiartzungo bertso-eskolaren papera herrian aldatu egin delakoan dago: "Oiartzuni bertso-eskolak egiten dion ekarpena da noizean behin saioren bat, laginen bat eskaintzea. Urte batzuetan, harrobi dezentea edukita, saioak eduki ditugu astebururo eta oiartzuarrak nekatu xamar dauzkagu beharbada, eta orain ari gara beste bide bat egiten oreka horretara iristeko. Gure aurretik lanean ibili zirenek dimentsio bat eta leku bat eman zioten bertsolaritzari. Presentzia handiko talde bat izan da bertso-eskola".

 Alaia Martini ere, ordea, egiten dio ekarpena bertso-eskolak: "Niri bertso-eskolak egiten didan ekarpena da beregan bertsoa daukala, eta lagun-talde bat bihurtu zaidala oso gertuko lagunekin osatua. Plazer bat da jende horrekin konpartitzea pasioa, denbora eta, kasu askotan, lana".

• 
•